भोटेकोशी नदीमा भदौ १० गते आएको विनाशकारी बाढीका कारण नुवाकोटस्थित ६० मेगावाट क्षमताको माथिल्लो त्रिशूली–३ ‘ए’ जलविद्युत् आयोजनाको सुरुङभित्र फसेकामध्ये दुई जनाको जीवितै उद्धार गरिएको छ ।
भोटेकोशी नदीमा बाढी गएको १० दिनपछि सञ्जय शाह र कविर महर्जनको शुक्रबार जीवितै उद्धार गरिएको हो। बाढीपछि उनीहरू सुरुङभित्रै फसेका थिए। आयोजनामा शाह मेकानिकल फोरम्यान र कबीर महर्जन मेकानिकल सुपरभाइजरका रूपमा कार्यरत थिए।
३० वर्षिय साह सप्तरी कोइलाडी–८का हुन् । यस्तै ४५ वर्षिय महर्जन काठमाण्डु बालकुमारी–३का बासिन्दा हुन् ।
त्यसअघि उद्धार टोली र सुरुङभित्र फसेका व्यक्तिहरूबिच दोहोरो संवाद भएको थियो ।
सुरुङभित्र अन्य व्यक्तिहरू पनि रहेको आशंका गरिएको छ। सुरुङभित्र रहेका अन्य व्यक्तिहरूको खोज तथा उद्धार कार्य जारी छ। उद्धारमा नेपाली सेना, सशस्त्र प्रहरी तथा प्राविधिक टोली परिचालित छन्।
सुरुङभित्रबाट जीवित व्यक्तिको उद्धार हुन थालेपछि बाँकी व्यक्तिहरूको पनि सकुशल उद्धार हुने आशा बढेको छ।
उद्धारपछि बाहिर निकालिएका साहले सुरुङभित्र फसेका सबै मानिस सकुशल रहेको बताएका छन् । शाह र महर्जनलाई उपचारका लागि हेलिकप्टरमार्फत काठमाडौँ ल्याएको छ ।
